Mesa de entroido, 2. A perspectiva inversa (aínda que non de todo) Andres GV

A cabeza do primeiro plano á dereita perténcelle a Dans Couto, que non está en actitude orante, aínda que o pareza, senón simplemente expectante, porque acababamos de nos sentar e xa pasaban das tres da tarde. No contraluz do fondo, na cabeceira da mesa Juan Sanlés, escoltado pola dereita nada menos que por Dios, controla o ritmo da conversa. Asoma pola esquerda o perfil de Fernández Barros . Diante del tanto Pereira Castiñeiras como Suárez Cotelo atenden a algunha precisión de fondura de parte de Sánchez Otero, que non aparece, pero que concentra as olladas de todos os comensais. O que non é discutible é a sensación de corrección, saber estar, venerable porte, de todos os que, ademais de mesa e mantel, estabamos compartindo amizade adobada con nostalxias.