CONTRA FACTA NON VALENT ARGUMENTA

Está ben que o sañudo,fero e fanático camariñán que destaca pola ruindade de impedir que arrolara a barca presente os razoamentos e argumentos de pouca monta , na súa defensa, ante as instancias que considere conveniente. Vivimos nun estado de dereito e a carta magna impide que xamais se poida producir indefensión.

Este denunciante que non está motivado polo ánimo de ser un soprón nin un delator senón un cidadán que quere cumprir co deber que nos impuña a primeira constitución, proclamada nas Cortes de Cádiz,(Celébrase o 2º centenario este ano) de ser xusto e benéfico e impedir o anormal funcionamento de calquera institución civil ou relixiosa como é a pedra de avalar da Virxe da Barca.

O pillabán e pícaro que o impediu, por moi nobres e leais que sexan os motivos heroicos que o animan a actuar dese modo, non debe quedar impune polo dano causado ás emocións e sentimentos dos romeiros,coma nós, que acoden a barca coa ilusión de avalar a pedra. En realidade foi un atentado contra etnografía espiritual que aniñaba nos nosos antepasados uns milenios antes da era cristián conforme explicou o Doutor Castro.

O implicado e presunto imputado debería escoller a vía pola que quere levar o procedemento para esclarecer este asunto e debía buscar consello para ver como podería saír mais beneficiado. Vai empeorar e desmellorar a súa situación levando como fiscal a José Mª Tacón que en filosofía fixo prácticas nas escolas sofistas. Era un experto en argumentos demagóxicos. Dominaba as regras dos siloxismos de modo maxistral introducindo premisas particulares facéndoas pasar por universais. Chegaba a conclusións aberrantes que admitía o seu contrincante sen decatarse do embuste e da trampa. A dialéctica de Tacón nos anos mozos enleaba ao mais pintado urbanita que tiñan fama de ser mais listos ca os do campo ou do mar.

Se escolles a xurisdición militar implicando a Ramón Senín tampouco ías saír mellor parado. Ademais como serviu na arma de artillería ía mandarche os tiros por elevación e tampouco terías moita salvación.

O mellor é que te acollas a xurisdición eclesiástica para que che bote unha man Ríal a quen como ti visitan as musas e por enchufe e cuña delas se quede todo nunha leve penitencia. Tamén Vilariño que che ten moito aprecio podía formar parte do Tribunal e sempre sairías mellor parado que con Tacón de fiscal.

Amigo Puertas deséxoche sorte para saír do encerellamento no que ti soíño te metiches. Como, mentres non teñamos outra xunta xeral da quinta, non se tomara ningunha medida sancionadora contra ti, tes aínda tempo de escoller o procedemento e o peor que che podería pasar e andar na boca do mundo como o moinante e pillabán que puxo un pouco de humor que tanta falla nos fai como terapia de moitos dos nosos males. Un saúdo para todos. Como xa rematou a oitava da festa de convivencia deste ano na próxima colaboración ,a esta canle comunicativa, xa diremos algo mais en serio.Rafael