REFORMA CURRICULAR: XUSTA E NECESARIA

Saúdos

As entradas de Rafael e Antonio anímanme a corresponder. Grazas, Rafael, por abrirme a páxina da túa Enciclorrafapedia para informarme dos compoñentes da Comisión da Doutrina e da Fe e da Comisión Permanente da CEE. O problema é máis grave do que pensaba. Un saúdo tamén a Fernando, que tan ben nos aclarou algúns dos temas cos que soñamos arreo

Avance

Como vivimos tempos tan materialistas, moitos falan de recortes en educación en termos económicos. Non comprenden que é unha reforma profunda, estrutural e equilibrada que impulsará o ensino público e potenciará o esforzo dos nosos escolinos. Acabouse a lei do mínimo esforzo.

Como adianto, algunhas pistas materializadas en recreto*-lei no xoves negro do 17:

* Recreto: palabra enigmática pronunciada polo Presi. Contén as letras de recorte.

Matemáticas

1. A regra de tres pasará a ser regra de un, porque así tócalle sempre ao mesmo.
2. Os alumnos de Primaria xa non estudarán as catro regras, senón tres: queda suprimida a multiplicación por innecesaria.
3. A raíz cadrada será circular; afórranse así as catro esquinas e a tentación de mexar nelas.
4. As potencias quedarán reducidas a flacideces. É necesario. A sufrir!
5. Os triángulos pasarán a ter dous lados e dous ángulos. Os tríos non están ben vistos.
6. Os polígonos serán, en xeral, olígonos: de poucos ángulos.
7. A progresión xeométrica funcionará como a aritmética ata o ano 2016.
8. O signo + será utilizado en caso de extrema necesidade. Exemplo: o I+D+i será reconvertido en I-D-i.
9. Os séculos sufrirán un recorte do 20%. Durarán 80 anos.
10. Os sexenios durarán catro anos; os trienios, dous. Non se cobrará por eles.

Estamos tan mal

que parece o

ano que vén.

Lingua e literatura

1. Quedan suprimidos os superlativos e as hipérboles, por esaxerados.
2. Os sinónimos e as comparacións de superioridade evítense no posible.
3. Declárase a supremacía de mono- fronte a poli-. Os polifacéticos, como Valentín Paz Andrade, deberán ser monofacéticos.
4. Quedan suprimidos os politraumatismos. Nos hospitais públicos só atenderán os monotraumatismos dos que teñan papeis.
5. Todos os enchufes serán monofásicos.
6. As corais polifónicas serán monofónicas ao día seguinte da publicación do decreto-lei. Gran noticia para Fernando, que poderá alixeirar os ensaios coa coral de Arnoís.
7. O mono será animal especialmente protexido, agás o de familia monoparental.
8. Os elementos con, maxi- e macro-cederán ante sen, mini- e micro-. Exemplo: consenso e consentido serán sensenso e sensentido.
9. Recoméndase usar a discreción o prefixo latino in- e o grego a-/an-. Exemplo: inesgotable, innegociable, inhumana, analfabeta.
10. O número plural irá cedendo ante o singular. No 2015 acadaremos a discrepatio 0 ou pensamento único.
11. O m perderá unha pata ante b e p. Os grafemas discapacitados en mobilidade poderán usar bastón, previa compra.
12. Os adverbios de lugar adiante e arriba serán substituídos polos antónimos atrás e abaixo.
    Excepción: Adiante, Presi! Arriba España!
13. O dicionario, verbacén para embaucar, suprimirá palabras longas como otorrinolaringoloxía, nicenoconstantinopolitano ou supercalifraxilísticoespialidoso.
14. O h suprímese por mudo. O Estatuto de Galicia permítenos esbirrar e dicir: H mico!
15. Os sonetos, ata agora de 14 versos, non poderán sobrepar os 10: dous tercetos e dous binetos ou pareados. Máis fácil para os poetas, como Antonio.
16. Garcilaso de la Vega perderá a propiedade das terras herdadas e será Garcilaso a secas.
17. Los amantes de Teruel serán El amante de Teruel, con permiso de Hartzenbusch.
    Estamos tan ben
    que parece o
    ano que pasou.

Relixión católica

1. Os mandamentos da lei de Deus serán oito. Consensuaremos coa CEE cales se suspenden.
2. Dos mandamentos da Igrexa suprimirase un, que non sexa o cuarto: xexunar...
3. A corte celestial será reducida. Anxos e Arcanxos son os máís ameazados de ERE. Permanecerán seguros os Tronos e as Dominacións. Isto pode afectarlle negativamente a Rafa, síntoo.
4. Os Reis Magos serán dous. Vai ao paro Baltasar, por negro. Afórrase, de paso a mantenza dun camelo, que come e, sobre todo, bebe demasiado e pode atropelar nenos na cabalgata.
5. Na mesma liña coherente, do portal de Belén retirarase o boi e a mula: comen moita herba.
6. As virtudes teologais serán dúas. Permanecerá a fe, na reforma, e a Esperanza, por ter título nobiliario e apelido vasco.
7. Os sacramentos serán catro: bautismo (do Goberno), confirmación (da mentira), penitencia (de votantes e veciños) e a extremaunción dos moribundos asfixiados.
8. As potencias da alma serán dúas. Suprímese a memoria, especialmente a histórica e a recente da campaña electoral.
9. Dos novísimos queda suprimida a Gloria, porque se prohibe ser feliz.
10. En moral, o pecado mortal será recualificado como venial, de acordo co novo PXOM (Plan xeral de ordenación moral).

Estamos tan mal

que parece o

ano que vén.

Ecoloxía

1. As xirafas recortarán o pescozo nun 25% para protexer a vexetación da sabana. Os cisnes, un 15% para reducir as afeccións respiratorias de animais que viven en permanente humidade.
2. Os avións planearán a baixa altura para aforrar queroseno nas subidas.
3. As focas non poderán aparearse cos seus machos: os focos consomen moita pila.
4. As escolas infantís xa non terán galiña azul, que a pintura vai cara. Serán escolas de galiña de cor como Deus manda.
5. Fumigaranse os insectos, tamén as abellas, para impulsar a monodiversidade, porque na biodiversidade pululan os gamberros e maleantes.
6. A política dos tres R -reducir, reutilizar e reciclar- non sufrirá variación sensible. Os tres R servirán para recortar, recortar e recortar.
7. No próximo bienio, as tesoiras subirán de prezo por efecto da lei de oferta e demanda.

Estamos tan ben

que parece o

ano que pasou.

Xeografía

1. Non se estudarán os ríos máis caudalosos e longos. Serán substituídos por regueiros, regos e mexadas de campo.
2. A montañas máis altas cambiaranse por outeiros, montiños e castros.
3. Os océanos seran substituídos por mares, a poder ser cerrados, como o mar Morto e o Caspio.
4. As rías galegas, nin mentalas. A invitaciónn á risa desdramatiza a coxuntura.

Estamos tan mal

que parece o

ano que vén.

Historia

1. A bandeira de Galicia será só branca. Que agora xa non sobra pintura azul da galiña. Así gozaremos dunha paz irresistible.
2. A bandeira española perderá a cor do ouro, por ser moi “ostentórea”. Lucirá o vermello.
3. Recortarase a lista dos reis godos estudando só os números pares, para alixeirar a godienda.
4. O Alzamento nacional planeará a rente do chan. Coidado coas cabezas!
5. Quedarán suprimidas as 17 Comunidades Autónomas. Así España volverá ser unha, grande e libre (ou lebre,cambiada por gato?).

Estamos tan ben

que parece o

ano que pasou.

Consideracción final

1. Queda garantido que non se rebaixará o calidade do ensino e o Estado de benestar.
2. Estas medidas non están inspiradas polo proxecto de impoñer ideoloxías.
3. Cada venres haberá novas reformistas, ou non.
   Palabra de Wert.
   Máis información sobre as causas:
   mailto:www.luis@dewindows.sen

Hic habitat felicitas

Pese á prima de risco, á recesión e á bolsa que nos leva a vida, a bankia non se afunde, hai diñeiro para rato.

Palabra de Presi. O dente queda para carnes máis tenras.

Outro recorte é posible, colaboremos dando ideas.

En vez de queixarte pola escuridade, prende a luz. Hai razón para a Esperanza. Para a primavera/verán quédanos o mar e a montaña: a praia das Gaivotas e a serra do Voitres.

Saúde.

Edu*

*Asino así porque ardo en desexos de recortar, unha patoloxía obsesiva.